Ravikiranalu TV

ఆంధ్రప్రదేశ్ లో ఎన్నికలు ?

ఆంధ్రప్రదేశ్ హైకోర్టు ఎట్టి పరిస్థితుల్లో మార్చి నెలాఖరుకల్లా స్థానిక ఎన్నికలు నిర్వహించాలని ఆంధ్రప్రదేశ్ ప్రభుత్వానికి ఆదేశాలు జారీ చేసింది. ఒకవేళ ఈ నెలాఖరులోపు స్థానిక ఎన్నికలు పూర్తి కాకపోతే ఆంధ్రప్రదేశ్ ప్రభుత్వానికి 14 ఆర్ధిక సంఘం నుంచి రావాలిసిన నిధులకు బ్రేక్ పడే అవకాశం ఉండటంతో ప్రభుత్వంలో టెన్షన్ నెలకొంది.కాగా స్థానిక సంస్థల ఎన్నికల్లో ప్రభుత్వం ఇచ్చిన 59 శాతం రిజర్వేషన్ అంశంపై హైకోర్టు రిజర్వ్ చేసి ఉండటంతో ఆ విషయంలో క్లారిటీ రాగానే వెంటనే ఎన్నికల సంఘం రాష్ట్రంలో ఎన్నికలు నిర్వహించడానికి రెడీ అవుతున్నట్లు తెలుస్తోంది. హైకోర్టు రిజర్వేషన్లపై ఏ విధమైన తీర్పు బట్టి దానికి అనుగుణంగా తక్షణ ఎన్నికలకు ఈసి కసరత్తు పూర్తి చేసినట్లు తెలుస్తుంది. ఏపీ లోని పంచాయితీలు, మునిసిపాలిటీ, కార్పొరేషన్ లకు సంబంధించి అన్ని లెక్కలతో అధికార యంత్రాంగం సమాయత్తం అయ్యింది.ప్రస్తుతం ఆంధ్రప్రదేశ్ ప్రభుత్వం ఆర్ధిక పరిస్థితి దినదినగండంగానే నడుస్తుంది. ఈ నేపథ్యంలో స్థానిక సంస్థల ఎన్నికలు నిర్వహించకపోతే 14 ఆర్ధిక సంఘం విడుదల చేసే 3 వేలకోట్ల రూపాయలకు పైబడి నిధులు వెనక్కి వెళ్లిపోయే అవకాశం ఉండటంతో ఏపీ ప్రభుత్వం లో టెన్షన్ నెలకొంది.

వ్యవసాయం అందక అన్నదాత ఆత్మహత్యాయత్నం

కొన ఊపిరితో కొట్టుమిట్టాడుతోంది

కోటలో ఓ ప్రైవేటు వైద్యశాలలో చికిత్స పొందుతున్న రైతన్నను ఆదుకునే దిక్కే లేదా

ఈశ్వరవాక గ్రామంలో బొల్లి సుబ్రహ్మణ్యం అనే రైతుకు 1.1/4 సెంట్లు కౌలుకు 1 ఎకరా... మొత్తం 2.1/4 సెంట్లు భూమిలో వరి సాగు చేస్తూ కుటుంబాన్ని పోషించుకుంటూ ఉండేవాడు ఈమధ్య వర్షాలు సరిగా లేక భూమిలో నీరు అందక వేసిన పంటలు చేతికి రాక ముగ్గురు బిడ్డల పోషణకై మరియు పంట వేసుకున్నందుకు బయట అప్పులు చేసే వాడు అదే క్రమంలో ఈసారి వర్షాలు బాగా పడడం నీరు సమృద్ధిగా ఉండడంతో ఆనందంతో మరికొంత ఎక్కువ అప్పు చేసి పంట వేశాడు అయినా ఆ రైతు పై ప్రకృతి కన్నెర్ర చేసి వేసిన వరి కు వారిపుండ్లు పడి ఆశించిన పంట చేతికి రాకపోగా వచ్చిన అరకొర పంట ఆశించిన రేటు లేకపోవడంతో వచ్చిన కొంత నగదు తో అప్పులు కట్టలేక అప్పులు బాధలు తట్టుకోలేక ఆత్మహత్య చేసుకున్నాడని కుటుంబ సభ్యులు ఆరోపణ ఆ రైతు కొన ఊపిరితో కొట్టుమిట్టాడుతూ కోట పరిధిలో ఓ ప్రైవేటు వైద్యశాలలో చికిత్స

పొందుతున్నాడు. సంబంధిత అధికారులు స్పందించి అన్నదాతల ఆవేదన అర్థం చేసుకుంటే బాగుంటుందని ఆశిద్దాం.

యువశక్తితోనే దేశాభివృద్ధి

యువతలోని శక్తియుక్తులను, నైపుణ్యాలను వెలికితీసి వారిని జాతి నిర్మాణంలో పాలు పంచుకునే విధంగా తీర్చిదిద్దడమే నైబర్హుడ్ పార్లమెంట్ ప్రోగ్రాం ఉద్దేశ్యమని ముఖ్యఅతిథిగా విచ్చేసిన బ్రేక్ ఇన్స్పెక్టర్ కె. మురళీమోహన్ పేర్కొన్నారు. నెహ్రూ యువకేంద్ర ఆధ్వర్యంలో సోమవారం ఉదయం సూళ్లూరుపేటలోని ఎస్ వి ఎస్ ఎస్ సి ప్రభుత్వ డిగ్రీ కళాశాల నందు సూళ్లూరుపేట బ్లాక్ లెవెల్ నైబర్హుడ్ పార్లమెంటు ప్రోగ్రాం ఘనంగా జరిగింది. ఈ సందర్భంగా ఆయన మాట్లాడుతూ.. భారత ప్రభుత్వం యువజన వ్యవహారాలు మరియు క్రీడా మంత్రిత్వశాఖ నూతనంగా ప్రవేశపెట్టిన నేషనల్ యంగ్ లీడర్స్ ప్రోగ్రాం అనే కేంద్ర ప్రభుత్వ పథకంలో భాగంగా భారతదేశంలోని 623 జిల్లాల్లోనూ కార్యక్రమం జరుగుతూవుంది. గ్రామస్థాయిలో యువత తమ సమస్యలను స్థానిక పరిపాలనాంశాల ద్వారా పరిష్కరించుకునేందుకు ఒక వేదికను తయారుచేయుట దీని లక్ష్యాలలో ఒకటని తెలియజేశారు. డిప్యూటీ తహశీల్దారు (సూళ్లూరుపేట) జె. స్వప్న మాట్లాడుతూ.. కేంద్ర ప్రభుత్వం ప్రవేశపెట్టిన జాతీయ యువజన అభివృద్ధి కార్యక్రమంలో భాగంగా యువత అభివృద్ధిని దృష్టిలో పెట్టుకొని యువజన సంఘాల బలోపేతానికి నాయకత్వ లక్షణాలు పెంపొందించుకొనుటకు వివిధ సంక్షేమ, అభివృద్ధి పథకాల సహాకారంతో వివిధ మండలాల్లో సమస్యల పరిష్కారమునకు సూచనలు, మార్గదర్శకాలను రూపొందించడం జరుగుతుందని వివరించారు. తొలుత.. స్వామి వివేకానంద చిత్రపటానికి పూలమాలవేసి నివాళులు అర్పించారు. అనంతరం యువతకు యోగాసనాలను ప్రదర్శించి యోగా ప్రాముఖ్యతను తెలియజేశారు. ఈ కార్యక్రమంలో పినాకిని యూత్ వెల్ఫేర్ అసోసియేషన్ అధ్యక్షుడు కె. మురళీమోహన్ రాజు, మోటివేటర్ టి. వెంకటేశ్వర్లు, మున్సిపాలిటీ ప్లానింగ్ ఆఫీసర్ బి. ప్రవీణ్ కుమార్, నెహ్రూ యువకేంద్ర డిస్ట్రిక్ యూత్ కో ఆర్డినేటర్ ఆకుల మహేందర్రెడ్డి, వైస్ ప్రిన్సిపల్ డాక్టర్ కె. శివప్రసాద్, ఎన్ఎస్ఎస్ ప్రోగ్రామ్ ఆఫీసర్ వి. సుధాకర్ రావు, లెక్చరర్ నయంతుల్లా, యువత, విద్యార్థులు తదితరులు పాల్గొన్నారు.

జగనన్న పెండ్లి కానుకను సద్వినియోగం చేసుకోవాలి

సీమాంధ్ర బిసి సంక్షేమ సంఘం రాష్ట్ర అధ్యక్షులు ఉల్లిపాయల శంకరయ్య, జిల్లా కార్యదర్శి పెళ్ళూరు మునిరత్నం కుమారుని వివాహం సందర్బంగా గూడూరు రోటరీ క్లబ్‌ ఫంక్షన్‌ హాలుకు విచ్చేసి వధూవరులను ఆశీర్వదించారు. తదనంతరం ఆయన మాట్లాడుతూ రాష్ట్ర వ్యాప్తంగా ఎస్సీ, ఎస్టీ, బిసి లు జగనన్న పెళ్లికానుకను సద్వినియోగం చేసుకోవాలని అన్నారు. ప్రస్తుతం ఎస్సీ, ఎస్టీ లకు రూ.50000 వేలు బిసిలకు రూ.30000వేలు మాత్రమే ఉన్నందున ఏప్రిల్‌ 1వ తేది నుండి లక్ష రూపాయలు చేయుచున్నారని కనుక సద్వినియోగం చేసుకోవాలని అన్నారు. జగనన్న పథకాలు రాష్ట్ర ప్రజలకు ఎంతో మేలు జరుగుతుందని పరిపాలనా వికేంద్రీకరణ ద్వారా అన్ని ప్రాంతాల అభివృద్ది జరుగుతుందని తద్వారా ప్రాంతీయ విభేదాలు రావని అన్నారు. ఈ కార్యక్రమంలో టి.గంగాధరం, ఎన్‌.శీనయ్య, పి.సిద్దయ్య, కె.జయరామరాజు, ఎన్‌.వి.కృష్ణయ్య, సిహెచ్‌ హనుమంతరావు, ఏ.రామి, వై.అంకయ్య, తదితరులు పాల్గొన్నారు.

విద్యుత్ అధికారుల నిర్లక్ష్యం.. యువకుడి మృతి...

రాపూరు మండల పరిధిలోని మల్లమ్మ గుంట సమీపాన ఉన్న కొండేరు వాగు వద్ద 3 ఫేస్ విద్యుత్ తీగలు తెగి పడి ఉండటంతో.. అదే మార్గంలో పొలంలోకి వెళ్లి వస్తున్న దేవల్ల శ్రీనివాసులు(28) అనే యువకుడు విద్యుత్ తీగలు తగిలి అక్కడికక్కడే మృతి చెందిన సంఘటన ఆదివారం సాయంత్రం 5 గంటల 45 నిమిషాలు ప్రాంతంలో చోటు చేసుకుంది.. ఈ మేరకు సంఘటనా స్థలానికి చేరుకున్న స్థానికులు మృతదేహాన్ని కొండేరు గడ్డపైకి చేర్చారు. చేతికంది వచ్చిన కుమారుడు శ్రీనివాసులు విద్యుత్ షాక్ కాటు వేయడంతో తల్లిదండ్రులు వెంకటేశ్వర్లు.. లక్ష్మమ్మ.. కుటుంబ సభ్యులు కన్నీరు మున్నీరుగా విలపిస్తున్న దృశ్యం అందరిని కలచివేసింది

ఇంటింటికీ పింఛన్లు పంపిణీ

వైఎస్సాఆర్ పెన్షన్ కానుక కార్యక్రమంలో భాగంగా దేవరపాలెం గ్రామంలో ఇంటింటికీ తిరిగి పింఛన్లు రూరల్ ఎమ్మెల్యే కార్యాలయం ఇంఛార్జ్ కోటంరెడ్డి గిరిధర్ రెడ్డి అందజేసారు. గ్రామవాలంటీర్లతో కలిసి వెళ్లి, లబ్దిదారులను పరామర్శించి, ప్రభుత్వ పధకాలు అందుతున్నాయా లేదా అని అడిగి తెలుసుకున్నారు. ముఖ్యమంత్రి వై.ఎస్. జగన్ మోహన్ రెడ్డి పాదయాత్రలో ఇచ్చిన ప్రతి ఒక్క హామీని నెరవేర్చుకుంటూ ప్రజల మన్ననలు అందుకుంటున్నారని కోటంరెడ్డి గిరిధర్ రెడ్డి తెలియజేశారు.

శ్రీ శబరి శ్రీరామక్షేత్రం దేవస్థానంలో ట్రస్ట్ బోర్డు కమిటీ సభ్యుల ప్రమాణ స్వీకారం

శ్రీ శబరి శ్రీరామక్షేత్రం దేవస్థానంలో ట్రస్ట్ బోర్డు కమిటీ సభ్యుల ప్రమాణ స్వీకారానికి ముఖ్య అతిధులుగా ఇరిగేషన్ మంత్రి అనిల్ కుమార్ యాదవ్, నెల్లూరు రూరల్ ఎమ్మెల్యే కోటంరెడ్డి శ్రీధర్ రెడ్డి, విజయ డైరీ ఛైర్మెన్ కొండ్రెడ్డి రంగా రెడ్డి, జిల్లా యువజన విభాగం అధ్యక్షుడు రూప్ కుమార్ యాదవ్ మరియు రూరల్ ఎమ్మెల్యే కార్యాలయం ఇంఛార్జ్ కోటంరెడ్డి గిరిధర్ రెడ్డి హాజరైయ్యారు. నెల్లూరు జిల్లాలోనే త్వరితగతిన ఆలయాలకు ట్రస్ట్ బోర్డు కమిటీలను నిర్మించిన ఘనత రూరల్ ఎమ్మెల్యే కోటంరెడ్డి శ్రీధర్ రెడ్డి కే దక్కుతుందని ఇరిగేషన్ మంత్రి అనిల్ కుమార్ యాదవ్ అన్నారు. వై.ఎస్.ఆర్. కాంగ్రెస్ పార్టీ కోసం కష్టం చేసిన నాయకులు, కార్యకర్తలు మరియు ఆధ్యాత్మిక భావన కలిగిన వారికే శ్రీ శబరి శ్రీరామక్షేత్రం దేవస్థానం ట్రస్ట్ బోర్డు కమిటీ లో చోటు కల్పించామని రూరల్ ఎమ్మెల్యే కోటంరెడ్డి శ్రీధర్ రెడ్డి తెలిపారు.సామాన్య భక్తులకు ఎటువంటి ఇబ్బందులు లేకుండా చూడాలని నెల్లూరు రూరల్ ఎమ్మెల్యే కార్యాలయం ఇంఛార్జ్ కోటంరెడ్డి గిరిధర్ రెడ్డి కమిటీ సభ్యులకు సూచించారు.