Ravikiranalu TV

నూతన పింఛన్లు అందజేసిన మంత్రి అనీల్‌

నెల్లూరు నగరంలోని 48వ డివిజన్ కు చెందిన అర్హులైన నూతన పింఛనుదారులకు ఆ డివిజన్ నందు రాష్ట్ర జలవనరుల శాఖ మంత్రి డాక్టర్ పి.అనిల్ కుమార్ పింఛన్లు అందజేశారు. ఈ కార్యక్రమంలో వై.ఎస్.ఆర్.సి.పి నాయకులు కుంచాల శ్రీనివాసులు, దువ్వూరు శరత్ చంద్ర, మున్నా, రవి, జావిద్, రామయ్య, నారాయణ, సురేష్, కొణిదల సుధీర్, వేలూరు మహేష్, పెంచలయ్య, సూరిశెట్టి నరేంద్ర, తదితరులు పాల్గొన్నారు.

అభివృద్ది పనులకు ఇసుక కొరత లేకుండా చూడాలి - మంత్రి అనీల్‌

రాష్ట్ర అభివృద్ధి కోసం ప్రభుత్వం చేపడుతున్న పనులకు ఇసుక కొరత లేకుండా చూడాలని రాష్ట్ర జలవనరులశాఖ మంత్రి పి.అనిల్ కుమార్ అధికారులను ఆదేశించారు. శనివారం ఉదయం జిల్లా పరిషత్ కార్యాలయ సమావేశ మందిరంలో ఏర్పాటు చేయబడిన జిల్లా స్థాయి సమీక్షా సమావేశంలో రాష్ట్ర ప్రభుత్వం చేపడుతున్న పలు అభివృద్ధి కార్యక్రమాల పై జిల్లా అధి కారులతో మంత్రి సమీక్షించారు. ఈ సందర్భంగా మంత్రి మాట్లాడుతూ ప్రభుత్వ అభివృద్ధి పనులకు ఇసుక కొరత ఎందుకు వస్తుందని మైనింగ్ అధికారులను ప్రశ్నించారు. అవగాహన లోపంతో యిసుక వాహనాలు సీజ్ చేస్తున్నందున ప్రభుత్వ అభివృద్ధి పనులకు ఆటంకం కలుగుతుందన్నారు. ఈ విషయంలో అధికారులు జాగ్రత్త వహించి యిసుక సరఫరాలో అంతరాయం కలుగకుండా చూడవలసిందిగా గనులశాఖకు సంబంధించిన అధికారులను ఆదేశించారు. స్థానిక అవసరాలు కాదని, యితర జిల్లాలకు యిసుక ఎలా తరలిపోతుందని ప్రశ్నించారు. ప్రభుత్వం నిర్ణయించిన ధరలకన్నా ఎక్కువ ధరలకు యిసుక విక్రయం ఎందుకు జరుగుతుందని మైనింగ్ అధికారులను వివరణ కోరారు. ధరల లో వ్యత్యాసం ఎందుకు వస్తుందని అధికారులను ప్రశ్నించారు. గ్రావెల్ గురించి మాట్లాడుతూ, జిల్లాలో ప్రస్తుతం వున్న 6 గ్రావెల్ రీలు సరిపోవని, గ్రావెల్ మైనింగ్ కు ఏ ఏ ప్రాంతాలలో అవకాశం వుందో గుర్తించి వాటికి అనుమతులు మంజూరు చేయాలన్నారు. జిల్లాలో ప్రభుత్వం తల పెట్టిన 15 వందల కోట్లు రూపాయల అభివృద్ధి పనులు త్వరితగతిని పూర్తి చేయవలసి వున్నందున యిసుక కొరత రాకుండా చూడాలని మైనింగ్ అధికారులను ఆదేశించారు. ప్రభుత్వ పనులకు యిసుక సరఫరా చేసే వాహనాలను గుర్తించి వాటిని ఆపకుండా తగు చర్యలు తీసుకోవలసిందిగా అధికారులను ఆదేశించారు. జిల్లాలో త్రాగునీటి సమస్య గురించి మంత్రిగారు మాట్లాడుతూ, వేసవి రాబోతున్న దృష్ట్యా త్రాగునీటి సమస్య ఉత్పన్నం కాకుండా చర్యలు తీసుకోవాలన్నారు. జిల్లాలో త్రాగునీటి సమస్య పరిష్కారానికి తక్షణ చర్యలు, తీసుకొనేలా అప్రమత్తంగా వుండాలన్నారు. సి.ఎస్.ఆర్. ఫండదు త్రాగునీటి అవసరాలకు ఉపయోగించేలా చర్యలు చేపట్టాలన్నారు. జిల్లాలో మెట్ట ప్రాంతాలలో, త్రాగునీటి సమస్య అధికంగా వుంటుందని, త్రాగునీటి కొరకు ప్రజలు యిబ్బంది పడకుండా ఈ సమస్య పరిష్కారానికి తగు చర్యలు తీసుకోవాలన్నారు.

సీఎం జగన్ పై మండిపడ్డ నుడా మాజీ చైర్మన్

నెల్లూరు నగరంలోని స్థానిక తేదేపా కార్యాలయంలో ఏర్పాటు చేసిన విలేకర్ల సమావేశంలో సీఎం జగన్ పై నుడా మాజీ చైర్మన్ కోటంరెడ్డి శ్రీనివాసులురెడ్డి తీవ్ర స్థాయిలో మండిపడ్డారు. ఈ సందర్భంగా ఆయన మాట్లాడుతూ కేసీఆర్ డైరెక్షన్ లో సీఎం జగన్ పనిచేస్తూ.. రాష్టాన్ని సర్వ నాశనం చేస్తున్నాడని ఏపీని మూడు ప్రాంతాలుగా విడగొట్టి ఏర్పాటు వాదానికి బీజం వేస్తున్నాడని ఎద్దేవా చేశారు. ప్రజల ముసుగులో వైసీపీ గుండాలే చంద్రబాబును అడ్డుకున్నారు. రాష్టానికి దశ దిశ చూపిన వ్యక్తిని మూడు గంటల పాటు వ్యాన్ లో కూర్చుని పెట్టి పోలీసులు నాటకం ఆడారు. పోలీసుల తీరు కూడా చాలా అభ్యంతరకరంగా ఉంది. కావాలనే మమ్మల్ని ఇబ్బంది పెడుతున్న వారి లెక్కలు భవిష్యత్ లో సరి చేస్తాం. చంద్రబాబును అడ్డుకుంది విశాఖ వాసులు కాదు.. గుంటూరు, కడప నుంచి వచ్చిన వైసీపీ గుండాలే. ఫ్యాక్షన్ పాలన విశాఖకు వస్తుందనే అక్కడి వారు భయపడుతున్నారు. వైసీపీ చేసిన కోట్ల రూపాయల భూ కబ్జాలు బయటపడతాయనే చంద్రబాబును ప్లాన్ ప్రకారం అడ్డుకున్నారు. సీఎం జగన్ సిగ్గు లేకుండా మాట్లాడుతున్నాడు. హైకోర్టు మూడుసార్లు ప్రభుత్వానికి మొటిక్కాయలు జగన్ కు బుద్ది రావడం లేదు. చంద్రబాబు పర్యటనను ఎక్కడైనా అడ్డుకుంటే టీడీపీ కూడా ప్రతిఘటిస్తుంది. విజయసాయిరెడ్డి శకుని రాజకీయాలు చేస్తూ రాష్టాన్ని చిన్నాభిన్నం చేస్తున్నాడని ఆవేదన వ్యక్తం చేశారు.

లబ్ధిదారుల ఇంటికే పెన్షను నగదు

- కమిషనర్ పివివిస్ మూర్తి

వృద్ధులు, దివ్యంగుల సౌకర్యార్థం సచివాలయ వ్యవస్థ ద్వారా రాష్ట్ర ప్రభుత్వం అమలుచేస్తున్న నూతన విధానంలో వైఎస్సార్ పెన్షను పధకం లబ్ధిదారుల ఇంటి వద్దకే పెన్షను నగదును అందజేస్తున్నామని నగర పాలక సంస్థ కమిషనర్ పివివిస్ మూర్తి ప్రకటించారు. కార్యాలయంలో ఆయన చాంబర్లో పెన్షను విభాగం అధికారులతో సమీక్షా సమావేశాన్ని నిర్వహించి ఒకటవ తేదీన జరిగే పంపిణీ కార్యక్రమంపై విశ్లేషించారు. ఈ సందర్భంగా కమిషనర్ మాట్లాడుతూ ఫిబ్రవరి నెలలో తొలగించిన పెన్షనులను రాష్ట్ర ప్రభుత్వం పునరుద్ధరించి లబ్ధిదారులకు మార్చి నెలలో రెండు నెలల నగదును అందజేస్తామని తెలిపారు. తొలగించిన అన్ని పెన్షన్లు తిరిగి అందిస్తున్నామని, పెన్షనులను పునరుద్ధరిస్తామనే దళారుల మాటలు విని మోసపోవద్దని కమిషనర్ సూచించారు.

ప్రజాబాట నిర్వహించిన రూరల్‌ ఎమ్మెల్యే

నెల్లూరు రూరల్ నియోజకవర్గ పరిధిలోని 18వ డివిజన్, కొండాయపాలెం, బృందావనం కాలనీలలో ప్రజాబాట నిర్వహించిన రూరల్ ఎమ్మెల్యే కోటంరెడ్డి శ్రీధర్ రెడ్డి, రూరల్ ఎమ్మెల్యే కార్యాలయం ఇంఛార్జ్ కోటంరెడ్డి గిరిధర్ రెడ్డి ప్రజాబాట నిర్వహించారు. ఏదైనా అభివృద్ధి అనేది ప్రజల నిర్ణయం ప్రకారం, ప్రజల భాగస్వామ్యంతో నాణ్యత ప్రమాణాలతో అభివృద్ధి చేయడం జరుగుతుందని రూరల్ ఎమ్మెల్యే కోటంరెడ్డి శ్రీధర్ రెడ్డి తెలిపారు. కొండాయపాలెం ప్రాంతంలో 10 లక్షల వ్యయంతో మూడురోజుల్లో నిర్మాణపనులు శంకుస్థాపన చేయడం జరుగుతుందని ముఖ్యమంత్రి వై.ఎస్. జగన్ మోహన్ రెడ్డి, ఇరిగేషన్ మంత్రి అనిల్ కుమార్ యాదవ్ సహకారంలో రూరల్ నియోజకవర్గంలో 150 కోట్ల రూపాయలతో అభివృద్ధి పనులు చేయడం జరుగుతుందని రూరల్ ఎమ్మెల్యే కార్యాలయం ఇంఛార్జ్ కోటంరెడ్డి గిరిధర్ రెడ్డి పేర్కొన్నారు.

గ్యాస్ సిలీండర్ పేలి పురిల్లు దగ్దం..

చిట్టమూరు మండలం వల్లిపురంకు చెందిన ఆళ్ల భూపయ్య పూరిల్లు అగ్నికి ఆహుతయ్యింది. స్థానికుల కథనం మేరకు ఆళ్ల భూపయ్య కుటుంబ సభ్యులు సాయంత్రం దీపం వెలిగించి బయట ఊరికి వెళ్లారు. ఇంతలో 7:45 ప్రాంతంలో ఒక్కసారిగా మంటలు ఎగిసిపడ్డాయి. పెద్ద శబ్దంతో గ్యాస్ సిలిండర్ పేలడంతో మంటలు వ్యాపించి, దట్టమైన పొగలు అలుముకున్నాయి .స్థానికులు భయాందోళనలకు గురయ్యారు. ఆస్తి నష్టం సంభవించిందని స్థానికులు తెలియజేస్తున్నారు. చుట్టుపక్కల ప్రాంతాల్లో మొత్తం మిద్దెఇల్లు కావడంతో పెను ప్రమాదం తప్పింది .ప్రస్తుతం మంటలు అదుపులో ఉన్నట్లు కూడా స్థానికులు తెలియజేశారు .

పోలవరం ప్రాజెక్ట్‌ను పరిశీలించిన సీఎం జగన్‌

పశ్చిమగోదావరి: పోలవరం ప్రాజెక్ట్‌ పనులను ముఖ్యమంత్రి వైఎస్‌ జగన్‌మోహన్‌రెడ్డి పరిశీలిస్తున్నారు. ముఖ్యమంత్రి హోదాలో ఆయన రెండోసారి పోలవరం ప్రాజెక్ట్‌ను ఏరియల్‌ సర్వే ద్వారా సందర్శించి పనులను క్షేత్రస్థాయిలో పరిశీలించారు. ప్రాజెక్టు పనుల పురోగతిపై అధికారులతో సమీక్షించనున్నారు. అంతకు ముందు పోలవరం ప్రాజెక్టుకు వద్దకు చేరుకున్న సీఎం జగన్‌కు హెలిప్యాడ్‌ వద్ద మంత్రులు పిల్లి సుభాష్‌ చంద్రబోస్‌, పేర్ని నాని, అనిల్‌కుమార్‌ యాదవ్‌, ఆళ్ల నాని, తానేటి వనిత, చెరుకువాడ శ్రీరంగనాథ రాజు, పోలవరం ఎమ్మెల్యే తెల్లం బాలరాజు, కొట్టు సత్యనారాయణ, తల్లారి వెంకట్రావు, దేవులపల్లి ధనలక్ష్మి, జీఎస్ నాయుడు, ముదునూరి ప్రసాదరాజు, పుప్పాల వాసుబాబు, ఎంపీలు మార్గాని భరత్, కోటగిరి శ్రీధర్‌, కలెక్టర్‌ ముత్యాల రాజు స్వాగతం పలికారు.రాష్ట్రంలో సాగునీటి ప్రాజెక్టులను ప్రాధాన్యత క్రమంలో పూర్తిచేయడానికి ప్రభుత్వం రూపొందించిన కార్యాచరణ ప్రణాళిక(యాక్షన్‌ ప్లాన్‌) అమలును క్షేత్రస్థాయిలో పరిశీలించి, గడువులోగా పూర్తి చేయాడానికి తీసుకోవాల్సిన చర్యలపై జలవనరుల శాఖ అధికారులు, కాంట్రాక్టు సంస్థల ప్రతినిధులకు మార్గనిర్దేశం చేయడానికి సీఎం వైఎస్‌ జగన్‌ ప్రాజెక్టుల బాట పట్టారు.