Ravikiranalu TV

ప్రైవేటు పాఠశాలల్లో 25% పేద విద్యార్థులకు ఉచిత విద్య అందించాలని వినతి

ఆర్థికంగా సామాజికంగా వెనుకబడిన నీరు పేద విద్యార్థులకు ప్రైవేట్ విద్యా సంస్థల్లో ఉచిత విద్యకు అవకాశం కల్పించాల్సిందిగా బాలల హక్కుల పరిరక్షణ జాతీయ సంస్థ సభ్యులు

డా.R.G.ఆనంద్ కి సామాజిక కార్యకర్త పాముల హరిప్రసాద్ ఒక నివేదిక ద్వారా విజ్ఞప్తి చేశారు. నివేదికను పరిశీలించిన జాతీయ సభ్యులు తగుచర్యలు తీసుకుంటామని తెలియజేసారు. అదేవిదంగా ఆంధ్రప్రదేశ్లోని ప్రైవేటు పాఠశాలల్లో ఫీజులు నియంత్రించాలని కోరారు. ఈ చట్టం వల్లా నెల్లూరు జిల్లా లో ప్రతి సంవత్సరం లక్ష మంది నిరుపేద విద్యార్థులకు ఉచితవిద్య కల్పించవచ్చు.

శ్రీసిటీని సందర్శించిన కంచి కామకోటి పీఠాధిపతి విజయేంద్ర సరస్వతి

- ఆధునికత, ఆధ్యాత్మికత కలగలసిన ప్రాంతం శ్రీసిటీ అన్న శంకరాచార్య

శ్రీసిటీ, ఫిబ్రవరి 18, 2020:

ఆధ్యాత్మిక గురువు కంచి కామకోటి పీఠం పీఠాధిపతి ఆచార్య శ్రీ శ్రీ శ్రీ శంకర విజయేంద్ర సరస్వతి దీవెనలు పొందడం ద్వారా శ్రీసిటీ, ఇతర పరిసర ప్రాంత ప్రజలకు సోమవారం (ఫిబ్రవరి 17) ఒక అద్భుతమైన రోజుగా మిగిలింది. రాత్రి 9 గంటల సమయంలో శ్రీసిటీ విజిటర్స్ సెంటర్‌కు చేరుకున్న శ్రీ శంకరాచార్యులకు వేద పఠనాల మధ్య వేద పండితులతో కలసి శ్రీసిటీ మేనేజింగ్ డైరెక్టర్ రవీంద్ర సన్నారెడ్డి సాంప్రదాయ స్వాగతం పలికారు. స్థానిక బిజినెస్ సెంటర్లో ఆయనకు శ్రీసిటీ పుట్టుక, ప్రస్థానం, అభివృద్ధి, ఉపాధి అవకాశాలు, సామాజిక సేవా కార్యక్రమాల గురించి వివరించారు.

అనంతరం కమ్యూనిటీ హాల్ వద్ద భక్తులనుద్దేశించి ఆయన మాట్లాడుతూ, ఆధునికత, ఆధ్యాత్మికత సమపాళ్లలో కలగలసి అభివృద్ధి చెందుతున్న ప్రత్యేక ప్రాంతంగా శ్రీసిటీని అభివర్ణించారు. 50 వేల మందికి ఇక్కడ ఉపాధి లభించినందుకు తాను సంతోషిస్తున్నానని, భవిష్యత్తులో ఇది మరింత పెరగాలని ఆశిస్తున్నట్లు తెలిపారు. కృషి, పట్టుదల ఎల్లప్పుడూ మంచి ఫలితాలను ఇస్తాయని పేర్కొన్న ఆయన, శ్రీసిటీ విషయంలో అది రుజువైందన్నారు. ఆధునికత, కృషి, చిత్తశుద్ధి ప్రమాణాలుగా వీరు చేపడుతున్న చర్యల వలన ఇక్కడ మంచి శ్రేయస్సు, అభివృద్ధి, ప్రజలకు కావలసిన మేరకు ఉద్యోగ అవకాశాలు లభిస్తున్నాయన్నారు. వీరి ప్రయత్నాలు మరింత ఫలించి ఈ ప్రాంతానికి మంచి శ్రేయస్సును, శాంతిని కలుగచేయాలని ఆయన దీవించారు.

ధర్మం, ఐక్యమత్యం, శాంతి, ప్రేమ గల దేశం ఎల్లప్పుడూ అభివృద్ధి చెందుతుందన్న స్వామీజీ, మన సంస్కృతి కష్టపడి పనిచేయడం, ఇతరుల పట్ల దయ చూపడం మరియు చట్టబద్ధమైన జీవితాన్ని గడపడం నేర్పుతుందన్నారు. భిన్నత్వంలో ఏకత్వం మన దేశానికి ప్రత్యేకమైన బలం అన్నారు. వివిధ భాషలు, సంస్కృతులు చాలా కాలం నుండి ఇక్కడ సామరస్యంతో కలిసి ఉన్నాయని పేర్కొన్నారు. మనం సహనానికి చిరునామా అన్నారు. ఒక విధంగా, మనలో కరుణ, సహనం, సర్దుబాటు, ఇతరులకు సహాయం చేయడం వంటి లక్షణాలను అభివృద్ధి చేయడానికి మన ఉమ్మడి కుటుంబ వ్యవస్తే కారణమన్నారు. మన దేశం యొక్క గత వైభవాన్ని తిరిగి పొందడానికి కలిసి పని చేద్దామని పిలుపునిచ్చారు.

శంకరాచార్యుల సందర్శన పట్ల శ్రీసిటీ మేనేజింగ్ డైరెక్టర్ రవీంద్ర సన్నారెడ్డి మాట్లాడుతూ, స్వామీజీ శ్రీసిటీకి రావడం తాము అత్యంత గౌరవప్రదంగా భావిస్తున్నామన్నారు. శంకరాచార్యుల వారు అపర శివావతారమని మన నమ్మకం. పరమశివునికి ప్రియమైన రోజుగా భావించే సోమవారం నాడు స్వామిజీ శ్రీసిటీకి విచ్చేయడం శుభసూచకంగా భావిస్తున్నామని అన్నారు. ఆయన సందర్శన, దర్శనం, దైవిక ఆశీర్వాదాలు తమకు ఆధ్యాత్మిక బలాన్ని, ఆనందాన్ని, శాంతిని కలుగచేస్తాయన్నారు. శ్రీసిటీని సందర్శించిన మొట్టమొదటి పీఠాధిపతులు శ్రీ శంకరాచార్యులు కాగా, వారికి హృదయ పూర్వక కృతఙ్ఞతలు తెలిపారు.

అంతకు మునుపు, శంకరాచార్యులు శ్రీసిటీ పర్యటనలో భాగంగా శంకర నేత్రాలయ కంటి ఆసుపత్రి, కంచి కామకోటి చైల్డ్ ట్రస్ట్ ఆసుపత్రిని సందర్శించారు. అక్కడ శ్రీసిటీ కమ్యూనిటీకి, పరిసరాల్లోని ప్రజలకు, ముఖ్యంగా గ్రామీణ ప్రజలకు వారు అందిస్తున్న వైద్య సేవలను అడిగి తెలుసుకున్నారు. అలాగే క్రీక్ సైడ్ అపార్ట్మెంట్స్ వద్ద కొత్తగా నిర్మించిన షాపింగ్ కాంప్లెక్స్ భవనాన్ని ప్రారంభించారు.

కాగా, సోమవారం రాత్రి స్వామిజీ, ఆయన శిష్య బృందం శ్రీసిటీలో బసచేసి మంగళవారం ఉదయం చెన్నై బయలుదేరి వెళ్లారు. వీడ్కోలు సమయంలో శ్రీసిటీ ఎండీ రవీంద్ర సన్నారెడ్డి, మరికొందరు భక్తులు స్వామిజీ ఆశీర్వాదం పొందారు.

నగరంలో క్షుద్రపూజల కలకలం

నెల్లూరు జిల్లా కోవూరులో క్రికెట్ గ్రౌండ్ లో చేతబడి కలకలం రేపింది. కోవూరు మండలం పడుగుపాడులో ఈ ఘటన జరిగింది. పడుగుపాడులో క్రికెట్ మైదానంలో సోమవారం(ఫిబ్రవరి 17,2020) అర్థరాత్రి క్షుద్రపూజలు జరిగిన ఆనవాళ్లు ఉన్నాయి. మైదానంలో పెద్ద బొమ్మ గీసిన మంత్రగాళ్లు.. నల్లకోడిని బలిచ్చారు. దీంతో స్థానికులు భయాందోళన చెందుతున్నారు. రంగంలోకి దిగిన పోలీసులు కేసు నమోదు చేసి దర్యాఫ్తు చేపట్టారు. ఇది ఎవరి పనో తెలుసుకునే పనిలో పడ్డారు. కాగా, చేతబడి జరగడంతో ఏదన్నా అరిష్టం జరుగుతుందేమోనని స్థానికులు భయపడుతున్నారు. ఈ పని చేసిన వారిని వెంటనే గుర్తించి అరెస్ట్ చేయాలని, కఠినంగా శిక్షించాలని డిమాండ్ చేస్తున్నారు.

స్థానిక యువకులు మైదానంలో క్రికెట్ ఆడుతుంటారు. ఎప్పటిలాగే మంగళవారం గ్రౌండ్ కి వెళ్లారు. అక్కడ పెద్ద బొమ్మ, బలిచ్చిన నల్ల కోడిని చూసి షాక్ తిన్నారు. క్షుద్ర పూజల ఆనవాళ్లు కనిపించడంతో భయంతో పరుగు తీశారు. గ్రామంలోకి వెళ్లి అందరికి విషయం చెప్పారు. వెంటనే గ్రామస్తులు పోలీసులకు సమాచారం ఇచ్చారు. ఈ క్షుద్రపూజలు ఎవరు చేశారు, ఎందు కోసం చేశారు అనే వివరాలు తెలుసుకునే పనిలో పోలీసులున్నారు

ఇది గ్రామంలో ఉండే వారే చేశారా? లేక బయటి నుంచి వచ్చిన వ్యక్తుల పనా? అనేది తెలియాల్సి ఉంది. బయటి వ్యక్తులకు గ్రామస్తులు సహకరించారా అనే కోణంలోనూ పోలీసులు ఎంక్వైరీ చేస్తున్నారు. త్వరలోనే మిస్టరీ చేధిస్తామని పోలీసులు తెలిపారు. ప్రత్యర్థులను టార్గెట్ చేసుకుని ఈ బాణామతి చేసి ఉండొచ్చని గ్రామస్తులు అనుమానిస్తున్నారు. గుప్తనిధుల కోసం ఈ క్షుద్ర పూజలు చేసి ఉండొచ్చని మరికొందరు గ్రామస్తులు సందేహం వ్యక్తం చేశారు. గ్రామానికి చేరుకున్న పోలీసులు గ్రామస్తులను ఒక్కొక్కరిగా విచారిస్తున్నారు. అనుమానం ఉన్న వారిని అదుపులోకి తీసుకున్నారు.

సంక్రాంతిపల్లిలో ఆనం రామనారాయణ రెడ్డి విస్త్రృత పర్యటన

పలు అభివృద్ది పనులకు శంకుస్థాపనలు, ప్రారంభోత్సవాలు

రాపూరు : రాపూరు మండలంలోని సంక్రాంతిపల్లి గ్రామంలో వెంకటగిరి నియోజక వర్గ శాసనసభ్యులు ఆనం రామనారాయణ రెడ్డి పర్యటించి నూతన సచివాలయం శిలాపలకలు ఆవిష్కరించారు. అనంతరం ఆశావర్కర్లతో కలిసి వైఎస్ఆర్ మూడవ విడత కంటి వెలుగు కార్యక్రమాన్ని ప్రారంభించారు. ఈ సందర్భంగా ఆనం రామనారాయణ రెడ్డి మాట్లాడుతూ ప్రజల అభివృద్ధి, సంక్షేమమే ధ్యేయంగా ముఖ్యమంత్రి జగన్మోహన్ రెడ్డి చిత్తశుద్ధితో పని చేస్తున్నారని తెలిపారు. ప్రజలకు కంటి వైద్యం అందించేందుకు వైఎస్సార్‌ కంటి వెలుగు కార్యక్రమానికి ప్రభుత్వం శ్రీకారం చుట్టిందన్నారు. ప్రతిష్టాత్మకంగా ఏర్పాటు చేసిన వైఎస్సార్‌ కంటివెలుగు కార్యక్రమాన్ని వైద్యులు, అధికారులు, ప్రజలు పాల్గొని విజయవంతం చేయాలని పిలుపునిచ్చారు.

సంక్షేమమే ధ్యేయంగా వైఎస్ఆర్ కంటి వెలుగుకు శ్రీకారం

నెల్లూరు జిల్లా సర్వేపల్లి నియోజకవర్గం, పొదలకూరు మండలంలోని సామాజిక ఆరోగ్య కేంద్రం నందు మూడో విడత కంటి వెలుగు కార్యక్రమాన్ని వై.యస్.ఆర్. కాంగ్రెస్ పార్టీ జిల్లా అధ్యక్షులు, సర్వేపల్లి శాసనసభ్యులు కాకాణి గోవర్ధన్ రెడ్డి ప్రారంభించారు.కంటి పరీక్షలు నిర్వహిస్తున్న తీరును ఎమ్మెల్యే కాకాణి పరీశీలించారు. ఈ సందర్భంగా ఆయన మాట్లాడుతూ"సర్వేంద్రియానం నయనం ప్రధానం" అంటారు.మానవ శరీరంలోని అన్ని అవయవాలలో అతి ప్రాధాన్యత కలిగిన అవయవాలు కళ్లు అని కంటికి సంబంధించి వ్యాధులను గుర్తించి వైద్యం అందించేందుకు జగన్మోహన్ రెడ్డి వై.యస్.ఆర్.కంటి వెలుగుకు శ్రీకారం చుట్టారన్నారు.ప్రజల అభివృద్ధి, సంక్షేమమే ధ్యేయంగా జగన్మోహన్ రెడ్డి చిత్తశుద్ధితో పని చేస్తున్నారు.ఈ నియోజకవర్గం లో అతి పెద్దదైన, వెనుకబడిన పొదలకూరు ప్రాంతంలోని ప్రజలకు కంటి వైద్యం అందించేందుకు మొట్టమొదట వైఎస్సార్ కంటి వెలుగు కార్యక్రమానికి శ్రీకారం చుట్టాం.జగన్మోహన్ రెడ్డి సర్వేపల్లి నియోజకవర్గం లోని వైద్యశాలల అభివృద్ధి కోసం 5 కోట్ల రూపాయల నిధులు మంజూరు చేశారు.

ప్రతిష్టాత్మకంగా ప్రభుత్వం ఏర్పాటుచేసిన ఈ కార్యక్రమాన్ని వైద్యులు, అధికారులు విజయవంతం చేయాలి.గత జన్మభూమి కమిటీల మాదిరిగా కాకుండా ప్రజల సమస్యలను తెలుసుకొని, తీర్చేందుకు కృషి చేస్తున్న వ్యక్తి మన ముఖ్యమంత్రి జగన్మోహన్ రెడ్డి.కొందరు అర్హులకు పెన్షన్లు తొలగించారని అనవసరపు విమర్శలు చేస్తున్నారు.గత సర్వేల తప్పిదాల వల్ల తాత్కాలికంగా ఆగిన పెన్షన్లను అర్హులకు అందేలా చర్యలు తీసుకుంటున్నాం.

సర్వేపల్లి నియోజకవర్గం లోని మండల అధికారులతో పెన్షన్లపై ప్రతిరోజు సమీక్ష నిర్వహిస్తున్నాం.చనిపోయిన వారికి, ధనవంతులకు తప్ప అర్హులందరికీ పెన్షన్ అందుతుంది.

గతంలో పొదలకూరు మండలాన్ని డెల్టా గా మార్చామని చెప్పుకున్నారే తప్ప, చేసిన పరిస్థితులు లేవు.వైయస్సార్ కాంగ్రెస్ పార్టీ అధికారంలోకి వచ్చిన తర్వాత సెంటు పొలం ఎండిపోకుండా, రాజకీయాలకతీతంగా సాగునీరు అందించి, నిజమైన డెల్టాగా మార్చామని చెప్పేందుకు గర్వపడుతున్నా. గ్రామాలలో పూర్తి స్థాయిలో మౌలిక సదుపాయాలు కల్పిస్తాము.

మీ ఇంటి బిడ్డగా, ఈ ప్రాంత ప్రజల అభివృద్ధి, సంక్షేమమే ధ్యేయంగా పని చేస్తామని ఎమ్మెల్యే కాకాణి తెలియజేశారు.

స్కాలర్‌షిప్‌లు విడుదల చేయకపోతే ఉద్యమం తప్పదు - ఏబీవీపీ

ఫీజు రీయింబర్స్మెంట్ స్కాలర్షిప్పులు విడుదల చేయకపోతే ప్రభుత్వంపై ఉద్యమం తప్పదని ఏబీవీపీ జాతీయ కార్యవర్గ సభ్యులు మనోజ్ కుమార్ హెచ్చరించారు.ఎమ్మెల్యే లు ఎంపీ లు ఇళ్లను ముట్టడిస్తామని ఏబీవీపీ నాయకులు హెచ్చరించారు.అఖిల భారతీయ విద్యార్థి పరిషత్ ఏబీవీపీ ఆధ్వర్యంలో చిలుకూరులోని శ్రీ వేంకటేశ్వర కళాశాలలో కళాశాల గేట్ సమావేశం ఏర్పాటు చేయడం జరిగింది. ఈ సందర్భంగా ఎబివిపి జాతీయ కార్యవర్గ సభ్యులు మనోజ్ కుమార్ మాట్లాడుతూ 2017, 18, 19, ఫీజు రీయింబర్స్మెంట్ స్కాలర్షిప్ బకాయిల ప్రభుత్వం ఇంకా విడుదల చేయకపోవడం వల్ల విద్యార్థులు చాలా ఇబ్బందులు పడుతున్నారని తన తండ్రి వైయస్ రాజశేఖర్ రెడ్డి ప్రవేశపెట్టిన అటువంటి ఫీజు రీయింబర్స్మెంట్ పథకాన్ని తన తనయుడు తూట్లు పొడుస్తున్నారు అని అన్నారు. ఫీజు రియంబర్స్మెంట్ స్కాలర్షిప్లు విడుదల కాక కళాశాల యాజమాన్యం నుండి విద్యార్థులు ఇబ్బందులు ఎదుర్కొంటున్నారని అధ్యాపకులు జీతాలు లేక విద్యార్థులకు చదువు చెప్పే వారు లేక విద్యాభ్యాసం ఇబ్బందిగా ఉందని ఇప్పటికైనా నా ప్రభుత్వం స్పందించి వెంటనే ఫీజు రీయింబర్స్మెంట్ స్కాలర్షిప్ బకాయిలు విడుదల చేయాలని ఏబీవీపీ నాయకులు తెలియజేశారు. లేనిపక్షంలో ఎమ్మెల్యేలు ఎంపీలు ఇంటిని ముట్టడిస్తామని వారు హెచ్చరించారు. ఈ కార్యక్రమంలో జిల్లా హాస్టల్స్ కన్వీనర్ చిన్న, రాష్ట్ర కార్యవర్గ సభ్యులు హర్ష, కిరణ్, నవీన్, మహేష్, తదితరులు పాల్గొన్నారు.

వైఎస్‌ఆర్‌ కంటి వెలుగు 3వ విడత కార్యక్రమం

కొడవలూరు మండల ప్రాథమిక ఆరోగ్య కేంద్రం ఆవరణంలో రాష్ట్ర ముఖ్యమంత్రి వైఎస్‌ జగన్మోహనరెడ్డి ప్రతిష్ఠాత్మకంగా చేపట్టిన డా॥ వైఎస్‌ఆర్‌ కంటి వెలుగు 3వ విడత కార్యక్రమాన్ని కోవూరు నియోజకవర్గంలో గౌరవ ఎమ్మెల్యే నల్లపరెడ్డి ప్రసన్న కుమార్ రెడ్డి,డిసిఎమ్‌ఎస్‌ ఛైర్మన్ వీరి చలపతిరావు లాంఛనంగా ప్రారంభించారు. ఈ కార్యక్రమంలో వైద్య, ఆరోగ్య శాఖ అధికారులు, డాక్టర్లు, ఆశా వర్కర్లు, సిబ్బంది, మండల స్థాయి అధికారులు, నాయకులు, కార్యకర్తలు, ప్రజలు పాల్గొన్నారు.