Ravikiranalu TV

ధాన్యం కొనుగోలు కేంద్రాలపై జిల్లా మంత్రి సమీక్ష

నెల్లూరు, జనవరి 29, (రవికిరణాలు) : జిల్లాలో ఏర్పాటవుతున్న ధాన్యం కొనుగోలు కేంద్రాలను వచ్చే నెల మొదటి వారంలోగా ప్రారంభించాలని జిల్లా మంత్రి పోలుబోయిన అనీల్ కుమార్ యాదవ్ అధికారులను ఆదేశించారు. రైతులకు దీనిపై ఈలోగా విస్తృత ప్రచారం నిర్వహించాలని, అలాగే బ్యాంకు గ్యారంటీ వున్న మిల్లర్లనే ఎంపిక చేయాలని సూచించారు. గతంలో జరిగిన తప్పుల్ని పునరావృతం కాకుండా చూసుకోవాలని అధికారులకు స్పష్టం చేశారు. రైతుల అభివృద్ధికి కృషి చేయాలని సమీక్షా సమావేశంలో వెల్లడించారు. ఈ సమావేశంలో డిసిఎమ్‌ఎస్‌ ఛైర్మన్ వీరి చలపతిరావు, జెసి వినోద్ కుమార్,జిల్లా సివిల్ సప్లైస్ అధికారి
రోస్మాండ్,అధికారులు తదితరులు పాల్గొన్నారు.

స్థానిక ఎన్నికలపై స్పష్టత

‘స్థానిక’ రిజర్వేషన్లపై హైకోర్టులో పిల్‌ వేసిన బిర్రు ప్రతాప్‌రెడ్డి

ఎంపీటీసీ, జెడ్పీటీసీ, సర్పంచ్‌ ఎన్నికలపై రేపు హైకోర్టులో విచారణ

ఈ నెల 17నే షెడ్యూల్‌ ప్రకటనకు సిద్ధమైన రాష్ట్ర ఎన్నికల కమిషన్‌

సుప్రీంకోర్టు స్టేతో వాయిదా

50% మించిన రిజర్వేషన్లపై పలువురి అభ్యంతరాలు

ఎన్నికల నిర్వహణపై రేపు హైకోర్టులో విచారణ

రాష్ట్రంలో ఎంపీటీసీ, జెడ్పీటీసీ, గ్రామ సర్పంచ్‌లకు ఎన్నికల నిర్వహణపై రేపు స్పష్టత రానుంది. ఎన్నికలకు సంబంధించి రేపు హైకోర్టులో విచారణ జరగనుంది. ఎంపీటీసీ, జెడ్పీటీసీ ఎన్నికల నిర్వహణకు రాష్ట్ర ఎన్నికల కమిషన్‌ ఈ నెల 17నే ఎన్నికల షెడ్యూల్‌ ప్రకటించాల్సి ఉండగా, సుప్రీంకోర్టు స్టే కారణంగా ఆ ప్రక్రియ వాయిదా పడింది పంచాయతీరాజ్‌ ఎన్నికల్లో ఎస్సీ, ఎస్టీ, బీసీలకు 59.85 శాతం రిజర్వేషన్లు కల్పిస్తూ రాష్ట్ర ప్రభుత్వం డిసెంబర్‌ 28న ఉత్తర్వులు జారీ చేసింది. అయితే.. 50 శాతానికి మించి రిజర్వేషన్లు అమలు చేయడాన్ని సవాల్‌ చేస్తూ కొందరు సుప్రీంకోర్టును ఆశ్రయించారు. దీంతో కోర్టు ఎన్నికల నిర్వహణపై స్టే విధిస్తూ.. ఈ విషయాన్ని రాష్ట్ర హైకోర్టులోనే తేల్చుకోవాలని సూచించింది. ఈ నేపథ్యంలో నలుగురు వ్యక్తులు హైకోర్టులో పిటిషన్లు దాఖలు చేయడంతో వాటిపై రేపు విచారణ జరగనుంది. 59.85 శాతం రిజర్వేషన్ల ప్రకారం ఎన్నికలు నిర్వహించాలా.. 50 శాతానికే పరిమితం చేయాలా.. ఎన్నికలు ఎప్పుడు నిర్వహించాలి అనే అంశాలు హైకోర్టు ఇచ్చే తీర్పుపై ఆధారపడి ఉంటాయని పంచాయతీరాజ్‌ శాఖ కమిషనర్‌ కార్యాలయ అధికారులు, రాష్ట్ర ఎన్నికల కమిషన్‌ కార్యాలయ అధికారులు చెప్పారు

50 శాతానికి పరిమితం చేస్తే బీసీలకు తగ్గనున్న పదవులు
పంచాయతీరాజ్‌ ఎన్నికల్లో వివిధ పదవులకు ప్రభుత్వం ఇప్పటికే నిర్ణయించిన 59.85 శాతం రిజర్వేషన్లను హైకోర్టు 50 శాతానికి పరిమితం చేస్తే ఆ మేరకు 9.85 శాతం రిజర్వేషన్లను బీసీలకు తగ్గించాల్సి ఉంటుందని అధికారులు తెలిపారు. రాజ్యాంగం ప్రకారం.. ఎస్టీ, ఎస్సీలకు రాష్ట్రంలో వారి జనాభా నిష్పత్తి ప్రకారం 6.77 శాతం ఎస్టీలకు, 19.08 శాతం ఎస్సీలకు తప్పనిసరిగా రిజర్వేషన్లు కల్పించాల్సి ఉంటుందని వివరించారు. ఎస్సీ, ఎస్టీలకు పోగా బీసీలకు 24.15% మేర రిజర్వేషన్లు కల్పించడానికి వీలుందని చెప్పారు. కాగా, 59.85 శాతం రిజర్వేషన్ల ప్రకారం ప్రభుత్వం బీసీలకు 34% రిజర్వేషన్లు కల్పించిందని పేర్కొన్నారు.

ప్రభుత్వ సంక్షేమ ఫలాలు సకాలంలో అందేలా తగిన చర్యలు చేపట్టాలి

నెల్లూరు, జనవరి 28, (రవికిరణాలు) : అర్హులైన లబ్దిదారులందరికి ప్రభుత్వ సంక్షేమ ఫలాలు సకాలంలో త్వరితగతిన అందేలా తగిన చర్యలు చేపట్టాలని రాష్ట్ర ముఖ్యమంత్రి వై.ఎస్. జగన్ మోహన్ రెడ్డి అధికారులను ఆదేశించారు..మంగళవారం ఉదయం రాష్ట్ర సచివాలయం నుండి స్పందన కార్యక్రమం పై జిల్లా కలెక్టర్లతో ముఖ్యమంత్రి వీడియోకాన్ఫరెన్స్ నిర్వహించారు. ఈ సందర్భంగా వారు మాట్లాడుతూ స్పందన కార్యక్రమానికి సంబంధించి రేషన్ కార్డులు, పింఛను కార్డులు, ఇళ్ల స్థలాల అర్జీలు ఎక్కువగా వున్నాయన్నారు. ఇందుకు సంబంధించి వచ్చిన అర్జీ దారులను చిరునవ్వుతో పలకరించి వారి సమస్యలను త్వరితగతిన పరిష్కరించే విధంగా చర్యలు చేపట్టాలన్నారు. రేషన్ కార్డుల పై జిల్లా కలెక్టరు శ్రీ ఎం.వి. శేషగిరిబాబు మాట్లాడుతూ జిల్లాలో రేషన్ కార్డుల మార్పులు, చేర్పులు, కొత్త కార్డుల మంజూరు మరియు డోర్ డెలివరి పింఛన్లు జారీ కై అన్ని చర్యలు చేపట్టినట్లు ముఖ్యమంత్రికి వివరించారు. ఫిబ్రవరి 1వ తేదీ నాటికి కొత్త రేషన్ కార్డుల మంజూరు, పింఛన్లు ఇంటింటికి యిచ్చే విధంగా చర్యలు చేపట్టి పనులు పూర్తి చేయాలని ఈ సందర్బంగా జిల్లా అధికారులను ముఖ్యమంత్రి ఆదేశించారు. ఈ ఫిబ్రవరి 2 నాటికి లబ్దిదారుల వివరాలను సంబంధిత గ్రామ/వార్డు సచివాలయాలలో ప్రదర్శించాలన్నారు. కొత్తగా గ్రామ/వార్డు సచివాలయాలకు పింఛను లేదా రేషన్ కార్డులకు సంబంధించి వచ్చిన అర్జీలను తక్షణమే స్పందించి ఐదు రోజులలో సంబంధిత కార్డులను అందజేయాలన్నారు. ఇళ్ల స్థలాల పంపిణికి కార్యక్రమానికి సంబంధించి ఉగాది నాటికి రాష్ట్రంలో 25 లక్షల మంది లబ్ధిదారులకు ఇళ్ల స్థలాల పట్టాలు పంపిణీ చేయబడతాయన్నారు. లబ్దిదారుల అర్హతను బట్టి తుది జాబితాను గ్రామ సచివాలయాల్లో ప్రదర్శించాలన్నారు. నామ మాత్రంగా కాకుండా యిచ్చిన స్థలం నివాస యోగ్యంగా వుండాలని, అక్కడ వుండడానికి లబ్ధిదారులు సంతోషం వ్యక్తం చేయాలన్నారు. 2020, ఫిబ్రవరి 15 నాటికి ఈ కార్యక్రమం పూర్తి చేయాలన్నారు. మార్గదర్శకానికి పెద్ద పీఠ వేస్తామని అవినీతికి తావుండకూడదన్నారు.

జిల్లా కలెక్టర్లందరూ ప్రత్యేక శ్రద్ధ తీసుకొని పై కార్యక్రమానికి సంబంధించిన ఏర్పాట్లు పూర్తి చేయాలన్నారు. ఫిబ్రవరి 20 నుండి విద్యార్థులకు వసతి దీవెన కార్యక్రమం చేపట్టబడుతుందన్నారు. ఈ కార్యక్రమం ద్వారా 11 లక్షల 66 వేల మంది పిల్లలకు ప్రతి సంవత్సరం రూ.20,000/-లు యివ్వబడతాయని సదరు మొత్తం రెండు విడతలుగా ఫిబ్రవరి 20వ తేదీన రూ. 10,000/-లు, ఆగష్టులో రూ. 10,000/-లు వారి అకౌంటుకు జమచేయబడతాయన్నారు. రైతుభరోసా పథకం క్రింద గ్రామ సెక్రెటరియేట్లలో 11,158 రైతు భరోసా కేంద్రాలు ఏర్పాటు చేయబడతాయన్నారు. నాణ్యమైన రసాయన ఎరువులు, విత్తనాలు, క్రిమిసంహారక మందులు సదరు కేంద్రాల ద్వారా రైతులకు అందజేయబడతాయన్నారు. రైతులు పండించిన పంటలకు గిట్టుబాటు ధరను కల్పిస్తామన్నారు. రైతుభరోసా కేంద్రాలకు మౌలిక వసతులు కల్పిస్తామన్నారు. గ్రామ సచివాలయాలకు మౌలిక వసతుల సదుపాయం కల్పించవలసిన బాధ్యత జిల్లా కలెక్టర్లదేనన్నారు. గ్రామ సచివాలయాల ద్వారా చేపట్టబడే 541 పనులకు సంబంధించిన జాబితాను తయారు చేయించి గ్రామ సచివాలయాల్లో పెద్ద పెద్ద పోస్టర్ల ద్వారా ప్రదర్శించాలన్నారు. సదరు పనులు ఎన్నిరోజులలో పూర్తి చేయబడతాయోసూచించాలన్నారు. గ్రామ వాలంటీర్లతోపాటు వార్డు వాలంటీర్లకు కూడా హాజరు విధానాన్ని అమలు పరచాలన్నారు. గ్రామ సచివాలయాలలో వచ్చే అర్జీల పరిష్కారానికి సమయం నిర్ణయించడంతోపాటు రశీదులు కూడా యివ్వాలని పై పనులకు సంయుక్త కలెక్టర్లను ఇన్చార్జీలుగా నియమించాలని సంయుక్త కలెక్టర్ల కొరత వుంటే తెలియజేయాలన్నారు.ఫిబ్రవరి 15 నుండి కంటి వెలుగు పథకం ప్రారంభమవుతుందని, ఈ పథకం కింద అవ్వ, తాతలకు కంటి ఆపరేషన్లు చేయబడతాయన్నారు. పాఠశాల పిల్లలకు కంటి అద్దాల పంపిణి చేయబడుతుందన్నారు. 66 లక్షల 15 వేల 417 మంది పిల్లలు ఈ పథకం ద్వారా లబ్ది పొందనున్నారన్నారు. ఇదే సమయంలో హెల్త్ కార్డుల పంపిణీ కూడా చేపట్టడం జరుగుతుందన్నారు.అమ్మఒడి పథకం క్రింద 42 లక్షల 33 వేల 98 మంది తల్లులకు 15 వేల రూపాయల చొప్పున వారి బ్యాంకు ఖాతాలకు జమచేయబడతాయన్నారు. జిల్లా కలెక్టర్లందరూ వారానికొకరోజు పాఠశాలలకు వెళ్లి మధ్యాహ్న భోజన పథకానికి సంబంధించి పర్యవేక్షించాలన్నారు. మరుగుదొడ్లు ఏర్పాట్లను పరిశీలించాలన్నారు. ఆకస్మిక తనిఖీలు జరపాలని రెవెన్యూ డివిజనల్ అధికారి స్థాయి వారిని ఇన్ చార్జిగా నియమించాలన్నారు. ఇంటింటికి ఇసుకపంపిణి కార్యక్రమం గురించి మాట్లాడుతూ,2 లక్షల 12 వేల టన్నులు ఇసుకను అందుబాటులో వుంచాలన్నారు. ఫిబ్రవరి 15 నాటికి అన్ని జిల్లాలలో డోర్ డెలవరిల ద్వారా యిసుకను సరఫరా చేయడానికి తగిన చర్యలు

తీసుకోవాలన్నారు. ఇసుకరీచ్ లలో వీడియో కెమెరాలు ఏర్పాటు చేయాలన్నారు.దిశ చట్టానికి సంబంధించి ఫిబ్రవరి మొదటి వారం నాటికి ప్రతి జిల్లాలో దిశ పోలీసు స్టేషన్లు ప్రారంభించాలన్నారు. ఒక్కొక్క పోలీసు స్టేషన్లో 5 మంది ఎస్.ఐ.లను నియమించాలన్నారు. ప్రతి జిల్లాలో ఒక అంకితభావంతో పనిచేసే న్యాయస్థానంతో పాటు ఫోరెన్సిక్ ల్యాబ్ కూడా ఏర్పాటు చేయాలన్నారు. జిల్లా పోలీసు అధి కారులు పోలీసు స్టేషన్ల ఏర్పాటు బాధ్యత తీసుకోవాలన్నారు. ఔట్ సోర్సింగ్ సిబ్బంది గురించి మాట్లాడుతూ, వారి జీతాలు పూర్తిగా వారికి అందేలా చూడాలన్నారు. ఎటువంటి తగ్గుదల లేకుండా పూర్తి మొత్తాలను వారి అకౌంట్లకు జమచేయాలన్నారు. లంచాలకు తావు లేకుండా చూడాలని, ఎస్.సి., ఎస్.టి., బి.సి., మైనారిటీ వారికి ప్రాధాన్యతనిస్తూ వారికి సకాలంలో జీతాలు అందేలా ఔట్ సోర్సింగ్ కార్పొరేషన్ వారు చర్యలు చేపట్టాలన్నారు.ఈ వీడియోకాన్ఫరెన్స్ లో నెల్లూరు జిల్లా నుండి జిల్లా కలెక్టరు ఎం.వి. శేషగిరిబాబు, జిల్లా పోలీసు అధికారి భాస్కర్ భూషణ్, సంయుక్త కలెక్టరు డా. వి.వినోద్ కుమార్, స్పెషల్ కలెక్టరు దాసు, జడ్.పి. సి.ఇ.ఓ. సుశీల, డి.ఆర్.డి.ఎ.పి.డి. శీనా నాయక్, డి.ఎం.అండ్. హెచ్.ఓ. డా. రాజ్యలక్ష్మి, పౌర సరఫరాల అధికారి బాలకృష్ణా రావు, సి.పి.ఓ సురేష్ కుమార్, తదితరులు పాల్గొన్నారు.

ఆంధ్రప్రదేశ్ శాసన మండలి రద్దు పై నిరసన

ఆంధ్రప్రదేశ్ శాసన మండలిని అప్రజాస్వామికంగా రద్దు చేశారని నగర మాజీ మేయర్ అబ్దుల్ అజీజ్ ఆధ్వర్యంలో నెల్లూరు నగరంలో నిరసన ప్రదర్శన చేపట్టారు.

టోర్నమెంట్‌ని విజయవంతం చేయండి

నెల్లూరు, జనవరి 28, (రవికిరణాలు) : దేవ్‌ గోజుర్యు కరాటే డో ఇంటర్నేషనల్‌ ఇండియా సంస్థ రాష్ట్ర అధ్యక్షుడు రెన్షి ఎన్‌.వెంకటరమణ ఆధ్వర్యంలో ఫిబ్రవరి 16వ తేదిన నెల్లూరులోని ఎసి సుబ్బారెడ్డి స్టేడియంలో 7వ స్థాయి స్టేట్‌ లెవల్‌ కరాటే టోర్నమెంట్‌ నిర్వహించబడుతుందని తెలిపారు. ఈ టోర్నమెంట్‌కి రాష్ట్రంలోని 13 జిల్లాల నుంచి కరాటే విద్యార్ధిని విద్యార్ధులు పాల్గొని ఈ టోర్నమెంట్‌ని విజయవంతం చేయవలసిందిగా కోరుతున్నామన్నారు. ఈ టోర్నమెంట్‌ యెుక్క వివరాల కొరకు 9989847911 నెంబర్‌కు సంప్రదించాలని తెలియజేశారు. ఈ కార్యక్రమంలో దేవ్‌ గోజుర్యు టీమ్‌, తదితరులు పాల్గొన్నారు.

పెళ్లి పత్రిక పంపిస్తే.. శ్రీవారి తలంబ్రాలు

తిరుపతి: తిరుమల తిరుపతి దేవస్థానం వినూత్న కార్యక్రమం చేపట్టింది. కొత్తగా పెళ్లి చేసుకున్న దంపతులకు శ్రీవారికి నిర్వహించే నిత్య కళ్యాణంలో వినియోగించే పవిత్ర తలంబ్రాలను అందజేయాలని నిర్ణయించింది. ఈమేరకు టీటీడీ పీఆర్‌వో ఒక ప్రకటనలో పేర్కొన్నారు. శ్రీవారి ఆశీర్వచనం కావాలనుకునే నూతన దంపతులు కానీ, వారి తల్లిదండ్రులు కానీ పెళ్లి పత్రికను పోస్టు ద్వారా తమకు పంపిస్తే శ్రీవారి పవిత్ర తలంబ్రాలను వారికి పోస్టు ద్వారా ఉచితంగా అందజేస్తామని తెలిపారు.

డిసిసిబి సంఘాల నిర్వహణపై శిక్షణా శిబిరం

నెల్లూరు, జనవరి 28, (రవికిరణాలు) : నెల్లూరు కేంద్ర సహకార బ్యాంకులో జిల్లాలోని సహకార సంఘాల అధ్యక్షులకు అండ్‌ డైరెక్టర్లకు సంఘాల నిర్వహణపై జరిగిన శిక్షణా శిబిరం
లో డిసిసిబి ఛైర్మన్ ఆనం విజయకుమార్ రెడ్డి, డిసిఎమ్‌ఎస్‌ ఛైర్మన్ వీరి చలపతి రావు పాల్గొని సంఘాల అభివృద్ధికి మీ యొక్క అమూల్యమైన సలహాలను, సూచనలను తెలియజేయాలని సభ్యులకు విన్నవించారు. ఈ కార్యక్రమంలో సెంట్రల్ బ్యాంకు సిఈఓ-రమణా
రెడ్డి, ట్రైనీ ప్రిన్సిపాల్ గుర్రప్ప, జిల్లా డైరెక్టర్లు, పిఏసిఎస్‌ అధ్యక్షులు, డైరెక్టర్లు, సిఈఓ లు పాల్గొన్నారు. అనంతరం డిసిఎమ్‌ఎస్‌ ఛైర్మన్ వీరి చలపతిని చిరు సత్కరంతో సన్మానించారు.