Ravikiranalu TV

మాజీ ఎమ్మెల్యే పాశం సునీల్ కుమార్ హౌస్ అరెస్ట్

గూడూరు, జనవరి 20, (రవికిరణాలు) : నెల్లూరు జిల్లా గూడూరు నియోజకవర్గ టిడిపి మాజీ ఎమ్మెల్యే పాశం సునీల్ కుమార్‌ను పోలీసులు సోమవారం హౌస్ అరెస్ట్ చేశారు. ఛలో అమరావతిని నిరసిస్తూ టిడిపి నేతలు చేస్తున్న నిరసనలో భాగంగా వారిని హౌస్‌ అరెస్ట్‌ చేయడం జరిగిందన్నారు.

నేటి నుంచి నెల్లూరులో ఉపరాష్ట్రపతి పర్యటన

-సోమవారం ప్రాచీన తెలుగు విశిష్ట అధ్యయన కేంద్రంలో భాషానిపుణులతో మధ్యాహ్న భోజన సమావేశం
-హాజరుకానున్న ఏపీ గవర్నర్, కేంద్ర హెచ్చార్డీ మంత్రి

మంగళవారం విక్రమసింహపురి వర్సిటీ స్నాతకోత్సవానికి హాజరు గౌరవ ఉపరాష్ట్రపతి ముప్పవరపు వెంకయ్యనాయుడు 20, 21 తేదీల్లో నెల్లూరులో పర్యటించనున్నారు. వివిధ కార్యక్రమాల్లో పాల్గొనేందుకు చెన్నై నుంచి సోమవారం ఉదయం 11 గంటలకు వెంకటాచలం రైల్వేస్టేషన్ చేరుకుంటారు. అక్కడినుంచి వెంకటాచలంలోని స్వర్ణభారత్ ట్రస్టుకు ఉపరాష్ట్రపతి చేరుకుంటారు. ప్రాచీన తెలుగు విశిష్ట అధ్యయన కేంద్రం నిర్వహణకు
సూచనలు అందించేందుకు తెలుగు రాష్ట్రాలతోపాటు దేశం నలుమూలలనుంచి వచ్చిన తెలుగుభాషాకోవిదులు, నిపుణులు, అభిమానులకు సరస్వతి నగర్ లోని బీఎంపీటీసీ హాల్ లో మధ్యాహ్నం 12.45 గంటలకు ఏర్పాటుచేసిన విందులో ఆయన పాల్గొంటారు. వీరందరితో కలిసి సాయంత్రం 4.15 గంటలకు స్వర్ణభారత్ ట్రస్టులో ‘భువన విజయం’ సాంస్కృతిక కార్యక్రమాన్ని వీక్షిస్తారు. 21వ (మంగళవారం) ఉదయం 8 గంటలకు కేంద్ర మానవ వనరుల అభివృద్ధి శాఖ మంత్రి రమేశ్ పోఖ్రియాల్ నిశంక్ గారితో కలిసి ‘అక్షర’ విద్యాలయాన్ని సందర్శిస్తారు. అనంతరం ఉదయం 9.30 గంటలకు సరస్వతి నగర్ లోని దీన్ దయాళ్ అంత్యోదయ భవన్
లోని ప్రాచీన తెలుగు విశిష్ట అధ్యయన కేంద్రాన్ని మంత్రితో కలిసి ఆయన సందర్శిస్తారు. ఉదయం 11గంటలకు ఆంధ్రప్రదేశ్ గవర్నర్ విశ్వభూషణ్ హరిచందన్, కేంద్ర హెచ్చార్డీ మంత్రితో కలిసి స్వర్ణభారత్ ట్రస్టులోని ప్రజామందిరంలో జరుగుతున్న తెలుగు భాషాకోవిదుల వర్క్ షాప్ ముగింపు సమావేశంలో పాల్గొంటారు. సాయంత్రం 3.30 గంటలకు శ్రీ వెంకటేశ్వర కస్తూర్బా కళాక్షేత్రంలో జరగనున్న విక్రమ సింహపురి విశ్వవిద్యాలయం స్నాతకోత్సవంలో ఆయన పాల్గొంటారు. సాయంత్రం 5 గంటలకు వెంకటాచలం రైల్వేస్టేషన్ నుంచి చెన్నైకి బయలుదేరి వెళ్తారు.

"ఆరోగ్యశ్రీ" కి పూర్వ వైభవం జగనన్నతోనే సాధ్యం - ఎమ్మెల్యే కాకాణి

నెల్లూరు జిల్లా సర్వేపల్లి నియోజకవర్గం మనుబోలు గ్రామ పంచాయతీ కార్యాలయ ఆవరణంలో పల్స్ పోలియో కార్యక్రమాన్ని వై.యస్.ఆర్.కాంగ్రెస్ పార్టీ జిల్లా అధ్యక్షులు, సర్వేపల్లి శాసన సభ్యులు కాకాణి గోవర్ధన్ రెడ్డి ప్రారంభించారు.ఈ సందర్భంగా ఆయన మాట్లాడుతూ
ప్రభుత్వం పోలియో చుక్కల కార్యక్రమాన్ని రాష్ట్రవ్యాప్తంగా చేపడుతుంది.ఆరోగ్యవంతమైన సమాజాన్ని నిర్మించాలనే లక్ష్యంతో జగన్మోహన్ రెడ్డి పని చేస్తున్నారు.గతంలో మహానేత
రాజశేఖర్ రెడ్డి ఉన్న సమయంలో పేద వారికి కార్పొరేట్ స్థాయి వైద్యం అందించాలని "ఆరోగ్యశ్రీ" కార్డులను తీసుకుని వచ్చారు.ఆ తరువాత వచ్చిన ప్రభుత్వాలు "ఆరోగ్యశ్రీ" కార్డుల నుంచి వివిధ రకాల వ్యాధులను తొలగించి, "ఆరోగ్యశ్రీ"ని నిర్వీర్యం చేశాయి.గతంలో చంద్రబాబు "ఆరోగ్యశ్రీ" కార్డులకు అర్హత ఉన్న హాస్పిటల్స్ కు బిల్లులు చెల్లించని పరిస్థితి.
జగన్మోహన్ రెడ్డి "ఆరోగ్యశ్రీ" కి పూర్వ వైభవం తీసుకుని వచ్చే విధంగా కార్డులు పంపిణీ చేస్తున్నారు. 2089 వ్యాధులకు "ఆరోగ్యశ్రీ" కార్డుల కింద మన రాష్ట్రంలోనే కాకుండా, ఇతర రాష్ట్రాల్లో కూడా వైద్యం చేయించుకునే విధంగా జగన్మోహన్ రెడ్డి అమలు చేస్తున్నారు.వైద్యులు, సిబ్బంది కూడా అంకిత భావంతో పనిచేస్తూ పోలియో చుక్కలు వేస్తున్నారు.ఈ ప్రభుత్వం ఆరోగ్య వంతమైన సమాజాన్ని నిర్మించే విధంగా ముందుకు పోతుంది. ఈ పల్స్ పోలియో 100 శాతం వేసే విధంగా అధికారులు పని చేయాలి.వాలంటీర్లకు సెల్ ఫోన్స్ అందించే కార్యక్రమం చేపట్టడం సంతోషం.గత ప్రభుత్వం వాలంటీర్ల వ్యవస్థలా కాకుండా జన్మభూమి కమిటీలు పెట్టి అర్హులైన వారికి ఏమి ఇవ్వని పరిస్థితి.కానీ జగన్మోహన్ రెడ్డి వాలంటీర్ల వ్యవస్థను తీసుకొని వచ్చి అర్హులైన వారికి సంక్షేమ పథకాలు ఇంటి వద్దకే అందివ్వడం జరుగుతుంది.వాలంటీర్లు అంకిత భావంతో పనిచేస్తూ ప్రభుత్వానికి, జగన్మోహన్ రెడ్డికి మంచి పేరు తీసుకొని రావాలి.

విఎస్‌యులో పటిష్టంగా స్నాతకోత్సవ ఏర్పాట్లు

భారత ఉప రాష్ట్రపతి యం.వెంకయ్యనాయుడు, రాష్ట్ర గవర్నర్ బిశ్వ భూషణ్ హరిచందన్‌లు ఈ నెల 21వ తేదీన విక్రమ సింహపురి విశ్వ విద్యాలయం ఆధ్వర్యంలో జరిగే స్నాతకోత్సవ కార్యక్రమంలో పాల్గొనుచున్న నేపధ్యంలో స్నాతకోత్సవ ఏర్పాట్లను పటిష్టంగా ఏర్పాటు చేసినట్లు విక్రమ సింహపురి విశ్వవిద్యాలయం ఉప కులపతి ఆచార్య ఆర్.సుదర్శన రావు తెలిపారు. ఆదివారం ఉదయం స్థానిక కస్తూరిబా కళాక్షేత్రంలో ఏర్పాటు చేసిన పాత్రికేయుల సమావేశంలో విక్రమ సింహపురి విశ్వ విద్యాలయం ఉప కులపతి ఆచార్య ఆర్.సుదర్శన రావు మాట్లాడుతూ 2008 సంవత్సరంలో 6 కోర్సులతో ఏర్పాటు చేయబడిన విక్రమ సింహపురి విశ్వ
విద్యాలయం, నేడు 17 రెగ్యులర్ కోర్సుతో విద్యనందించడం జరుగుచున్నదన్నారు. తొలిసారిగా 2014 సంవత్సరంలో స్నాతకోత్సవ కార్యక్రమాన్ని నిర్వహించడం జరిగిందని, తదుపరి వివిధ కారణాల వలన స్నాతకోత్సవ కార్యక్రమాన్ని జరపబడ లేదని ఆయన తెలిపారు. 2014-15, 2015-16, 2016-17, 2017-18 సంవత్సరాలకు సంబంధించి 4 సంవత్సరాలకు ఒకే సారి ఈ నెల 21వ తేదీ స్నాతకోత్సవ కార్యక్రమాన్ని నిర్వహించి, విద్యార్థులకు పట్టాల ప్రదానం చేయడం జరుగుతుందన్నారు. ఈ నాలుగు సంవత్సరాలకు సంబంధించి మొత్తం 18,698 మంది విద్యార్థులు తమ పేర్లను నమోదు చేసుకోవడం జరిగిందని, ఇందులో 17,969 మంది విద్యార్థులకు సంబంధించిన పట్టాలు వారు విద్యనభ్యసించిన విశ్వ విద్యాలయం అనుబంధ కళాశాలకు పంపించడం జరుగుతుందని తెలిపారు. విశ్వ విద్యాలయం నియమ నిబంధనల మేరకు విశ్వ విద్యాలయం ప్రధాన కేంద్రంలోను, కావలిలోని పి.జి. కేంద్రంలో చదివిన 730 మంది విద్యార్థులకు మాత్రమే ఈ నెల 21వ తేదీన కస్తూరిభా కళాక్షేత్రంలో జరిగే స్నాతకోత్సవ కార్యక్రమంలో పట్టాలు ప్రదానం చేయబడునని ఉప కులపతి వివరించారు. వీరిలో వివిధ కోర్సులలో ఉత్తమ ప్రతిభ కనుపరచిన 60 మంది విద్యార్థులకు భారత ఉప రాష్ట్రపతి, రాష్ట్ర గవర్నర్‌ల చేతుల మీదుగా బంగారు పతకాలు అందించడం జరుగుతుందని తెలిపారు. ఈ విశ్వ విద్యాలయం ద్వారా అనేక సామాజిక కార్యక్రమాలు నిర్వహించడం జరుగుచున్నదని ఉప కులపతి ఆచార్య సుదర్శన రావు తెలిపారు. కంట్రోలర్ ఆఫ్ ఎగ్జామినేషన్ సాయి ప్రసాద్
మాట్లాడుతూ ఈ నెల 20వ తేదీ ఉదయం నుండి సంబంధిత విద్యార్థులు తమ గుర్తింపు కార్డులను అందజేసి, అడ్మిట్ కార్డులను పొందవచ్చునని, దీనికి గాను ఆర్ట్స్, సైన్స్, కామర్స్ అండ్ మేనేజ్ మెంట్ విభాగాలకు సంబంధించి వేరు వేరుగా మూడు హెల్ప్ డస్క్ లను ఏర్పాటు చేయడం జరుగుతుందని అయన తెలిపారు.

చుక్కల భూమి సమస్యలు వెంటనే పరిష్కరించాలి

చుక్కల భూమి సమస్యలు వెంటనే పరిష్కరించాలని ఆత్మకూరు జనసేన పార్టీ ఇన్చార్జి నళిశెట్టి శ్రీధర్ చేస్తున్న పాదయాత్రలో ఆహ్వానం మేరకు జనసేన నెల్లూరు పార్లమెంటరీ ఇన్చార్జి మనుక్రాంత్ రెడ్డి పాల్గొన్నారు. ఈ సందర్భంగా ఆయన మాట్లాడుతూ ఈ చుక్కల భూమి సమస్యను వెంటనే పరిష్కరించాలని, సుమారుగా పరిగణించిన తరువాత కూడా ఈ సమస్య తీరకపోవటం విచారకరమని, చెన్నారెడ్డి మనుక్రాంత్ స్పష్టం చేశారు. బిజెపితో కలవటం శుభపరిణామం అని రాబోయే రోజుల్లో కలిసి ప్రజా సంక్షేమ కార్యక్రమాలు నిర్వహిస్తామని తెలిపారు.

పల్స్ పోలియోలో భాగస్వాములు కండి

- కమిషనర్ పివివిస్ మూర్తి

పోలియో మహమ్మారిని అంతం చేసేందుకు ప్రతి ఒక్కరూ పల్స్ పోలియో కార్యక్రమంపై అవగాహన పెంచుకుని చిన్నారులకు చుక్కల మందు వేయించాలని నగర పాలక సంస్థ కమిషనర్ పివివిస్ మూర్తి ఆకాంక్షించారు. జాతీయ రోగ నిరోధక దినోత్సవం సందర్భంగా స్థానిక వేదాయపాలెంలోని నగర పాలక సంస్థ పాఠశాలలో ఏర్పాటు చేసిన పల్స్ పోలియో కార్యక్రమంలో ఆయన ఆదివారం పాల్గొని చిన్నారులకు చుక్కల మందు వేశారు. ఈ సందర్భంగా కమిషనర్ మాట్లాడుతూ నగర పాలక సంస్థ పరిధిలోని అన్ని ప్రధాన కూడళ్లు, పాఠశాలల్లో చుక్కల మందు పంపిణీ కార్యక్రమం చేపట్టామని, ప్రతీ చిన్నారికీ పోలియో చుక్కలు అందేలా అన్ని జాగ్రత్తలు తీసుకున్నామని తెలిపారు. ప్రయాణంలో ఉన్న చిన్నారులకోసం ప్రత్యేకంగా బస్ స్టాండ్లు, రైల్వే స్టేషన్లలో పల్స్ పోలియో కేంద్రాలను ఏర్పాటు చేసి ప్రజలకు అవగాహన కల్పించామని కమిషనర్ వెల్లడించారు.

ఎర్రచందనం స్మగ్లర్ల అరెస్ట్

ఎర్రచందనం స్మగ్లర్ల పై కఠిన చర్యలు తీసుకోవడంతో పాటు వారి ఆస్తులను జప్తు చేస్తూ చర్యలు తీసుకుంటామని నెల్లూరు జిల్లా యస్పి భాస్కర్ భూషణ్ ఇదివరకే స్పష్టమైన ఆదేశాలు జారీచేయడం జరిగింది. ఈ మేరకు గూడూరు డిఎస్పి, వెంకటగిరి సర్కిల్ ఇన్స్పెక్టర్, టాస్క్ ఫోర్సు ఇన్స్పెక్టర్ ఐ.శ్రీనివాస్, రాపూరు ఎస్సై లు సిహెచ్‌. కోటిరెడ్డి, కె.స్వప్న, వారి సిబ్బంది ఎర్రచందనం దుంగలను రవాణా చేస్తున్న స్మగ్లర్ ను పట్టుకొని అతని వద్ద నుంచి 10లక్షల విలువ చేసే ఎర్రచందన స్వాధీనం చేసుకున్నారు. పై ముద్దాయిని తేది 18.01.2020 న సాయంత్రం 18.30 గంటలకు రాపూ స్టేషన్ పరిధిలోని పులి బోర్డ్, రాపూరు-రాజంపేట రోడ్డు వద్ద రాపూరు ఎస్.ఐలు ఏ-1 అరెస్ట్ చేయగా, మిగిలిన ముద్దాయి ఏ-2 కోసం గాలింపు చర్యలు చేపట్టారు. ముద్దాయి గతంలో రాపూర్ పోలీసు స్టేషన్ లో పిడి యాక్ట్‌ కింద కేసులు నమోదు చేయబడి షీట్ కూడా ఓపెన్ చేయడం జరిగిందని పోలీసులు తెలిపారు. పై కేసును చేధించి, ముద్దాయిలను అరెస్ట్ చేయుటలో ప్రతిభ కనబరిచిన రాజ సిహెచ్‌ కోటిరెడ్డి, కె స్వప్న, వారి సిబ్బందిలను వెంకటగిరి సర్కిల్ ఇన్స్పెక్టర్ అన్వర్ బాష, టాస్క్ ఫోర్సు ఇన్స్పెక్టర్ ఐ.శ్రీనివాస్‌లు అభినందించారు.